Kadhata Sa’aatii Sadii

Maqaa Abbaa kan Ilmaa kan Afuura Qulqulluu Waaqa Tokko Ameen!

Faaruu 129

Yaa Waaqayyoo ani qilee keessa ta’een si waammadhe.

Sagalee koo naaf dhagayi;
gurri kee sagalee kadhannaa kootii kan dhaga’u haata’u.
Yaa Waaqayyoo osoo ati cubbuu namaa sakattaatee eenyuutu dhaabbataa?
Garuu dhiifamni si bira jira.
Kanaaf sababa maqaa keef abdiin si godhadhe;

lubbuun koo seera keetiin obsite.

Sa’atii barii irraa eegalee hanga
halkaniitti lubbuun koo Waaqayyoon amane.

Waaqayyo biraa haraara
isa biras fayyina hedduutu jira.
Innis Isiraa’eeliin cubbuu isaa mara irraa isa fayyisa.
Abbaa Ilma Afuura Qulqulluuf galanni haa ta’u bara baraan Ameen!

Kadhannaa Barii (Ganamaa)

Maqaa Abbaa kan Ilmaa kan Afuura Qulqulluu Waaqa Tokko Ameen!

Faarfannaa Daawwit 5
Yaa Waaqayyoo kadhannaa koo dhaggeeffadhu,
Iyya koos hubadhu;
Jecha kadhannaa koos dhaggeeffadhu,
Yaa Mootii koo yaa Waaqa koo,
Maaloo gara keettan kadhannaa koo dhiyeessa hoo.
Bariidhaan sagalee koo dhagayi,
Bariidhaan durakeen dhaabbadha sin eeggadhas.
Ati Waaqa badii hin jaallanne dha hoo;
Warri hamaan si wajjin hin bulani.
Akkasumaan kan boonan ija kee dura hin dhaabbatanu,
Warra hamaa hojjetan mara ni jibbite.
Kan soba dubbatan hunda ni balleessita;
Isa dhiiga dhangalaasuu fi warra gowwomsoota ta’an Waaqayyo ni balaaleeffata.
Ani garuu baay’ina araara keetiin
Gara mana keettan ol-seena;
Siin si sodaachuudhaan gara mana-qulqullummaa
Keettan sagada (ugguma).
Yaa Waaqayyoo sababa diinoota kootiif tolaan na gaggeessi;
Karaa koo dura keetti sirreessi.
Afaan isaanii keessa dhugaan hin jiru,
Onneen isaaniis gatii hin qabu,
Qoonqoon isaanii akka awwaala banamaa dha;
Arraba isaaniitiin ni gowwomsu.
Yaa Waaqayyoo isaanitti murteessi maree isaaniitiinis haa kufani;
Waa’ee baay’ina hammeenya isaaniitiifis isaaniin godaansiisi (hari’i),
Isaanis si gaddisiisaniiru hoo.
Kan sitti amanan martinuu ni gammadu;
Bara baraanis ni gammadu, isaaniinis ni eegda.
Maqaa kee kan jaallatan martinuu siin boonu.
Ati isa qulqulluu ni eebbista hoo;
Yaa Waaqayyoo akka gaachanaa haboodhaan nu marsite.
Galanni Abbaaf Ilmaaf Afuura Qulqulluuf haa ta’u bara baraan Ameen!
Hallee Luyaa galanni Waaqayyoof, Hallee Luyaa yeroo maraa galanni Amaanu’eel Waaqa keenyaaf haa ta’u. Yaa Gooftaa koo Iyyesuus Kiristoos akkan icciitii baruuf kennaa kee naaf laadhu, hammeenya afuuroota hamaa hammeenya isaanii naaf ibsi, gargaarsa Afuura Qulqulluutiin kadhata kootiin yeroon si gaafadhu dura kootii isaan fageessi isaan qaaneessi; kunis araara keetiin naaf haa ta’u, naaf haa raawwatu.
Harmee koo hirkoo koo Giiftii koo dubroo Maariyaam abdiin koo siiyidha kennaa kee isa eebbifamaa amanachuun gara Ilma kee Iyyesuus Kiristoositti akka na haraarsitu sin kadhadha.
Haraarri Waaqummaa Ilma kee akka narraa adda hin baane yeroo mara naaf kadhadhu. Gargaarsi kees akka naa golboobu jaalalli kee akka naaf baay’atu naaf taasisi. Yaa jaallatamtuu gara laafeetti dubroo Maariyaam abdii koo haraarsummaa kee irran taasifadha. Yeroo yerootti eegumsi kee akka narraa adda hin baane ifni kennaa kee naaf haa ifu.
Yaa Waaqayyoo Waaqa moototaa addunyaan osoo hin uumamiin dura kan turte addunyaa dabarsitee bara baraan kan jiraattu Gooftaa uumama maraa aduu guyyaadhaaf ifa; halkan boqonnaa ilma namaatiif kan uumte yaa Waaqayyoo sin galateeffadha; ati halkanicha nagaadhaan dabarsitee gara jalqaba guyyaa kan ta’e ganama kanaan waan na geesseef sin galateeffadha; kadhannaa koo gara si isa Mootii addunyaa tottolchiteettin dhiyeeffadha. Dhugaa isa ta’e beekumsa ifa kee naaf dhiyeessi ibsaa laphee koo naaf ibsi ifni Waaqummaa kee laphee koo keessatti akka naaf ifuuf guyyaan jalqabe kana tolaa fi qulqullummaan akkasumas seera gaariidhaan xumuree gufuu malee jireenya koo akkan dabarsuuf na gargaari. Ati eebbifamaadha hoo kabaja, galata fi sagada Abbaa Ilma Afuura Qulqulluutiif nan dhiyeessa hanga bara baraatti Ameen!
Itti fufa...

KADHATA

   

Maqaa Abbaa kan Ilmaa kan Afuura Qulqulluu Waaqa Tokko Ameen!

SEENSA

   Kadhata jechuun harka Waaqayyoo irraa eebba gaafachuu jechuu dha. Karaa kan birootiin immoo gatii kadhannaadhaan argamu jechuu dha. Kanaafis ragaan “Isa kadhateef gatiin isaa isaaf laatama” jedha. Gabaabaatti kadhata jechuun Waaqayyo wajjin haasa’u meeshaa wanna feene (barbaanne) tokko Waaqayyo biraa ittiin argannu dha. 

  Kadhata yeroo mara osoo addaan hin kutiin kadhachuun akka nurra jiru; addaan kutuun akka nurra hin jirre yeroo barsiisu Gooftaan fakkeenyaan akkas jedhee isaanitti dubbate kunis Wangeela Luqaas boqonnaa 18 lakk. 1-14 irratti isa barreeffame dha. Kadhannaadhaaf gaggeessaa keenya kan ta’e Gooftaan keenya Iyyesuus Kiristoos iddoo tokkotti kadhannaa taasisee erga xumuree booda barattoota (duukaa buutota) isaa kessaa tokko “Yaa Gooftaa Yohaannis barattoota isaa akkuma kadhannaa barsiise; atis nuun nu barsiisi” isaan jedhe. Gooftaan keenyas deebisee isinis yeroo kadhattan; “Yaa Abbaa keenyaa samii irra kan jiraattu maqaan kee haa galateeffamu; mootummaan kee haa dhufu eeyyamni kee samii irratti akkuma ta’e akkasumas lafa irratti haa ta’u kan nu ga’u soorata keenya (biddeena keenya) har’a nuuf laadhu (kenni) kan nu yakkaniif yakka isaanii akkuma dhiisnu yakka keenya nuuf dhiisi hamaa irraa nu oolchi malee qorumsatti nu hin galchiin.” (Luq. 11: 1-4) jedhee isaan  barsiise. 

  Kanaafuu kiristaana kan ta’e martinuu maqaa Abbaa Ilmaa Afuura Qulqulluutti amanee qaamolee sadan waaqummaadhaan waaqa tokko jedhee yeroo mara kadhannaa gara Uumaa isaatti dhiyeessuu qaba. Kadhannaan abboommii Waaqa biraa ajajame ta’uun isaa kitaaba qulqulluu keessatti iddoo baay’eetti barreeffameera. 

1^ffaa - Gooftaan keenyaa fi Fayyisaan kenyaa Iyyesuus Kiristoos  “Qormaatatti akka hin seenneef jabaadhaa kadhadhaa” jedheera. (Maat.26:41)

2^ffaa – “Kan kadhattan mara akka argattaniitti taasisaa amanaa isiniif raawwatama. Kadhannaadhaaf yeroo dhaabbattanus Abbaan keessan inni samii gubbaa jiraatu ammoo cubbuu keessan akka isinii dhiisuuf eenyu illee kan isin yakke yoo jiraate dhiifama godhaafi dhiifama gochuufii yoo diddan Abbaan keessanis dhiifama isiniif hin godhu. (Maar. 11:24-26) 

3^ffaa – “Onneen keessan baay’ina dhugaatii fi machiin waa’ee gaa’ilaa yaaduun akka hin dadhabne, guyyaan sunis akka tasaa akka isinitti kiyyoo isinirraan ga’u egaa dhufuuf kan jiru kana mara  jalaa miliquuf ilma namaa (Kiristoos) dura dhaabbachuuf akka dandeessanitti yeroo kadhattanu yeroo mara jabaadhaa. (Luq. 21:34-36)

4^ffaa – “Dhuguma dhuguman isiniin jedha; Abbaan maqaa kootiin kan isin kadhattanu mara isiniif laata (kenna) hanga yoonaatti maqaa kootiin homaa hin kadhanne gammachuun keessan tasa gaarii akka ta’uuf kadhadhaa ni fudhattu.” (Yoh. 16:24) Duukaa bu’ichi fi Qulqullichi Phaawuloosis “Osoo addaan hin kutiin kadhadhaa” isan jedhe sanas hin dagatiin (1 Tasaloonqee 5:16)

  Egaa gabaabaadhumatti seensa kadhannaaf akka ta’u yaadnee kan barreessine kun kadhannaa isa guddaaf seensa akka ta’uuf yaadnee kadhannaa isa guddaa irraa hir’isnee gabaabsuudhaan Afaan Gi’iiziitiin isa barreeffame mara amantoota Afaan Gi’iizii fi Afaan Amaaraa hin beekneef Afaan Oromoo isa beekaniin yoo kadhatan akkan isaan fayyadu ta’uu isaa yaaduun yeroo mara sa’aatiitiin kadhachuu kan danda’an martinu akka ittiin kadhatanuuf sababa hojiitiin yeroo yerootti kadhachuu namoota hin dandeenyeef sa’aatii mijataa guyyaa boqonnaa akka ittiin kadhatanuuf yeroo gabaabaa keessatti  dubbisamee kan dhumu baay’atee kan hin quufamne kitaaba jaallatamaa waan ta’eef amantoonni martinuu akka itti fayyadamanuuf kitaabni kun qophaa’eera. 

Itti fufa...   

Galanni Waaqayyoof akkasumas Haadhaa fi Giiftii keenya Maariyaamiif haa ta’u Ameen!

( Qopheessaan: Nugusuu Alamuu)