ደብረዘይት ዘቀዳሚት ሰንበት

በዲ/ን ስመኘው ጌትዬ

(መቅረዝ ዘተዋሕዶ፣ መጋቢት 20 ቀን 2006 ዓ.ም.)፡- በስመ አብ ወወልድ ወመንፈስ ቅዱስ አሐዱ አምላክ አሜን!!!

 የነፋሳት ሩጫን ያህል የዓይን ጥቅሻም ያህል ከሰዎችና ከመላእክት ዘንድ በአንድነት ለሚሠገድለት ለእርሱ ምሥጋና ይገባል:: ጥንት በሌለው በፊተኛው፣ ፍጻሜ በሌለው በኋለኛው ስም ሰላም ይሁንላችሁ:: (መጽሐፈ ምሥጢር)

 እንደሌላኛው ሳምንት ዛሬም የቅዳሜ ድርሰቱ ከሌሎች ቀናት አጠር ያለች እና ስለመስቀል ክብር የምታወሳ ናት::

“ርድአነ በኃይለ መስቀልከ… በመስቀልህ ኃይል እርዳን፡፡ በጠዋት ከእንቅልፍ ተነስተን እናመሰግንሃለን:: ለአንተ ምሥጋና ይገባል::” በመስቀሉ በኩል ስለተደረገው ሰላም ለሁላችሁ ሰላምታን በንጋት በመስጠት ቅዱስ ያሬድ ይጀምራል::

 በመቀጠል ጉልላቷ መስቀል የሆነች ቤተክርሰቲያንን ይሳለማታል:: “ትብል ቤተክርስቲያን አዋልደ ኢየሩሳሌም ፃኣ ትርዓያ… ቤተክስቲያን አለች፡- የኢየሩሳሌም ልጆች ንጉሣችሁን ታዩ ዘንድ ውጡ:: የእሾህ አክሊል አቀዳጁት፤ በእንጨት ላይ ሰቀሉት፤ በመስቀሉ ሕዝቡን አዳነ::” ደም ግባቱን ደም የሸፈነውን፣ እንደ ነገሥታት የዕንቁ አክሊል ሳይሆን የአዳምን እሾህ በጭንቅላቱ የተሸከመውን፣ ከገነት የሚያወጣ ሳይሆን ወደ ገነት የሚያስገባ እንጨት ላይ መድኃኒትን ያደረገውን ኑ ተመልከቱት::

 “ሰቀልዎ አይሁድ አፍአ እም ኢየሩሳሌም… አይሁድ ከኢየሩሳሌም ዉጭ ሰቀሉት፡፡ ቤተክርስቲያን ግን ኢየሱስን በእንጨት መስቀል ተቸንክሮ አይታ ወደደችው፤ ሰላምም አለችው::” ቤዛ የሆናትን፣ የአካሏን ራስ ለእርሷ ሲል ራሱን በሰጠበት መስቀል አይታው ፍቅሩ ገዛት:: ለእኛ ሲል በተሰቀለበት መስቀል ጌታን በልባችን ማየት ምንኛ መታደል ነው::

 “እስመ በመስቀሉ ለክርስቶስ ተሞዓ ሞት… በክርስቶስ መስቀል በከበረ ደሙ ሞት ተሸነፈ፤ ጨለማ ተሠደደ፤ ብርሃን ወጣ፤ ሰይጣን ታሠረ፤ ዓለም ተቀደሰ፤ ቤተክርስቲያን ተቀደሰች::… አቤቱ መስቀልህ ለባሪያዎች ነፃነት፣ ለሚያምኑት ሰላም፣ ለሙታን ትንሣኤ፣ በችግር ላሉት ረዳት፣ ለዓለም ሁሉ ብርሃን፣ የቤተክርስቲያን መሠረት ነው::” ስለዚህም ጽዮንን ክበቧት፤ በአዳራሿም በደስታና በሰላም ጸሎታችንን እናቅርብ:: የሰላም አምላክ ሰላሙን ያድለን::